BUS KA SAFAR OR OOT PATAANG HADSAAT

  Har insan ki zindagi may koi na koi aisa waqia zarur paish aata hai jisay soch k ya tou us ka chehra muskurahat say khil uthta hai ya phir baysakhta hansi choot jati hai yani wo apni kisi oot pataang harkat k baray may soch  k khilkhila raha hota hai. Mai nahi janti k aap k sath aisa hota hai ya nahi beharhaal meray sath tou bohot hua hai or khas tor par bus k safar k doraan.
  Mai us wqt first year mai thi jab mai nay mustaqil tor pay bus may jana shuru kea. Mera college NUMAISH par tha jo meray ghar say bohot dur hai. Kyun kay college k elawa us elaqay may kabhi jana bhi nahi hota tha is liay wahan ki nishaani NONIHAAL kay SIGN BOARD say lagai hui thi. Shuruaat k ek haftay bhai kay sath jana hua lekin asal masla tab paish aaya jab bhai ka college khatam hogya ab akailay bus me jana zra khatakta tha.Beharhaal HIMMAT.E.MARDAAN MADAD.E.KHUDA nikal pari apnay balbootay pay.
  Mjhe ab b yaad hai kabhi safar may mjhe neend nai i lekin us din neend ka aisa ghalba tari hua k safar hi safar may main nay khwab.e.khargoosh k mazay lootnay shuru kar diay. Na janay kab ankh lag gai or jab nend say faraghat pai tou aisa mehsoos hua jesay ye jaga tou college k rastay may kbhi dikhi hi nai...Ghari daikhnay par mera shak yaqeen may badal gya k college boht dur nikal chuka hai or mai TOWER pohonch chuki thi "baap ray ab kya hoga??" bus yai ek sawaal dimagh may gardish kar raha tha khair Allah Allah kar k kisi toor college pohonch gai lekin us k kch din baad tou hadh hi hogai ab tou na mai soi na hi rastay say apni nazrain hatain lekin phir b NIMAISH aa k hi na day, himmat bandh k conductor say pucha tou us ne dant k kaha "ANDHI HAI KYA?? YE BUS NUMAISH NAHI JATI.. JA K DUSRI BUS ME BAITHO" aapki soch hogi k us wqt meray upar kya guzar rai thi..sitti gum, hawannaq shakal or ankhain phati hui then meri phir wahan say bus badli or puchti pachti NUMAISH pohnchi.
  Ek or baar najanay kin sochon may gum thi k NUMAISH tou kya TOWER ka akhri stop b agya or main bus me ho baithi reh gai or phir usi bus tab tk baithi rahi jab tak wo ghoomti ghaamti wapis NUMAISH na pohonch gai.
  Har us din jab college may apni harkaton ki wajah say dair karti thi, dar k maray roti zaroor thi lekin aaj sochti hon tou hansti hon kyun k yahi wo bus kay yadgaar safar hain jin may janay anjanay mai nay pura Karachi ghoom lia.